Gley и Македонски Телеком продолжуваат со унапредување на соработката преку технолошки новини врзани за MagentaTV услуга, овозможувајќи целосна интероперабилност со стриминг платформата Gley како вградена апликација. Со новата надградба, корисниците што досега не се регистрирале на Gley ќе добијат автоматски кориснички профил веднаш при стартување на апликацијата и моментален пристап до комплетниот каталог на содржини.
Во моментов, MagentaTV брои речиси 60.000 активни корисници, а во наредниот период Македонски Телеком планира Magenta TV услугата да ја овозможи кај сите ТВ корисници. Овој обем на корисничка база ќе овозможи масовно проширување на техничкиот досег на Gley, особено на бесплатните и основниот пакет кој содржи реклами.
Од минатата недела, сите три претплатнички пакети на Gley – бесплатниот, основниот и премиум пакетот – се директно достапни на MagentaTV. Оваа промена значително го зајакнува присуството на рекламните пакети и отвора нови можности за брендовите кои сакаат таргетирана промоција во домашен видео-контекст.
Раните резултати покажуваат значителен пораст на нови корисници за платформата Gley преку автоматската регистрација на MagentaTV. Со комбинирањето на највисокиот квалитет на пренос и богатата содржина на македонски и албански јазик, ова партнерство нуди посебно и беспрекорно корисничко искуство.
„Поаѓајќи од потребите на корисниците за поедноставен и брз пристап до стриминг платформите, Македонски Телеком, како водечка дигитална компанија во Македонија, во соработка со GLEY, првата македонска стриминг платформа, развија единствено интегрирано решение кое со автоматско поврзување на корисниците ќе им го овозможи таквото искуство“ – изјави Иван Брзовски, Лидер за ТВ и конективност.
„Gley гордо го поддржува ова уникатно интегративно партнерство затоа што нашата мисија е да донесеме иновативна и целосно домашно произведена содржина на екраните во секој дом во било кое време и на било кое место“, изјави г-дин Дарко Перушески, извршен директор и ко-основач на Свод Мастер АД (фирмата-сопственик на платформата Gley), притоа појаснуваќи дека преку автоматската регистрација и проширените пакети за корисниците ќе се овозможи уште подостапно видео-искуство за публиката во Македонија.
